Epygramma

Multiplices cernis iamiam studiose libellos

      Quos impressorum praestitit arte labor

Ille tamen noster numquam prius usque repertus

      Et fuerat paucis cognitus ante liber.

5

Vtilis in primis frugi et brevis ille libellus

      Sub modicis chartis commoda multa tenens

At labor est ingens multos percurrere libros,

      Pro multis nobis hic satis unus erit.

Est opus electum: nomen viola atque legenti

10

      Vtilis et nullo frigore laesa viret.

Emptor habes animam valeas quo pascere flore,

      E coelo venit quicquid odoris habet

O quotiens dices: valeas bene candide Dorlant

      Qui primus doctis tradidit auctor opus.

Mathei Herbeni poetae laureati epygramma ad lectores

Quisque brevi cupias artis cunctas superare

      Atque oculo mentis cernere mira Dei,

Ire per ambages ac mille volumina librum

      Non opus est: namque haec perdocet iste liber.

5

Ergo hebetant artes et dogmata philosophorum,

      Rusticus hic vere doctior esse potest.

Grammaticus solus sapit hic plus arte quam ille

      Qui cunctas alias hac fine posse putat.

Nempe docet gradibus quibus ardua scandere possis

10

      Naturaeque simul discere quid sit homo.

Nec contentus eris si te quoque noveris ipse

      (Quod magnum est) pariter ducit ad alta Dei.

Nec revocare pedem sinit ad divos properantem

      Ni doctus redeat qui rudis ante fuit.

15

Hinc tua perpetua merces Dorlande manebit

      Ingenio cuius volvitur iste liber.

Extractus magno summa studio Raymundi

      Theologi sacri quae spatiosa fuit.

3. ad beatam Annam Carmen

Hic effunde preces devote poplite flexo,

      Anna parens ubi cum prole beata sedet

Ne dubita capies quicquid rogitaveris ipsam,

      Hancque potens precibus iugiter Anna nitet.

5

Nullius Anna preces umquam dimisit inanes

      Sed tulit optatam candida semper opem.

Ergo piam matrem multo cumulemus honore,

      Nullius vacuas quae sinit esse preces

Anna parens Iesu Christi genitricis aveto

10

      A nobis petimus omne repelle nefas.