M. Antonii Antimachi Mantuani carmen

Naso Corinna tuos expertus saepe calores

      Et quam fallaces sint in amore doli,

Edidit excultos hac callidus arte libellos,

      Quo facile ad dominam quisque teneret iter.

5

Scripsit et accensos quaenam medicina furores

      Tollat et illato vulnere praestet opem.

Quae facili quamvis sint scripta poemata versu,

      In multis fuerant non bene nota locis.

At modo discussit Merulae solertia docti

10

      Non exploratum quicquid habebat opus.

Huic igitur tantum debere fatentur amantes

      Nasoni quantum pallida turba suo.

Domici Palladii Sorani carmen

Quot puer incautus quondam pharetratus amantes

      Impulit ad saevae tela cruenta necis?

Quot laqueis periere fero sub amore iacentes,

      Quot rapuit miseros aestus et unda viros?

5

Saevus amor quondam, factus nunc mitior armis

      Leviter offendet pectora vincta suis

Namque modum facilemque viam docet artis amandi

      Hoc opus. Ast aliud vulneris edit opem.

Multum docta cohors Venerique obnoxia pubes

10

      Ingenio debet Naso poeta tuo.

Nec minus interpres eadem tibi Merula debet

      Quod per te multis quae latuere patent.

Ergo tibi innumeras pro tanto munere grates

      Merula culte tibi turba Latina refert.