In cenam datam Principi Bentivolo a Mino Roscio
Luculli cenas sileat patinasque Vitelli
Nec non Antoni prandia prisca fides;
Fercula pontificum nemo aut epulas Saliorum
Iactet et Albanas Cesareasque dapes;
5
Iam patina Esopi cedat, iam luxus Apici
Et Ptolemeorum prodiga luxuries;
Iam sua Campani taceant convivia, Poenus
Quae sensit Poenis pernitiosa suis,
Nec Medi iactent reges Siculique tyranni
10
Vana quaesitos ambitione cibos;
Omnia iam caedant convivia, prandia, cenae,
Quae celebrant vates famaque cantat anus:
Fercula sunt regum, sunt haec ientacula divum,
Haec nectar sapiunt pocula et ambrosiam;
15
Haec nitida, haec dubia est, haec est lautissima cena,
Quam gens dat genti Roscia Bentivolae.
Iuppiter huic epulo si forte vocatus adesset,
Diceret: "In celis talia non habeo".