Endecasyllabon ad inclytum baronem Vldricum Rosensem

Vldrici nitidos lares adite,

Centenae simul annotationes,

Atque a limine protinus salutem

Centenam date regulo Rosensi,

5

Quo nil candidius dedere terrae

Arctoae populis diu Latinis,

Qui comis facilis libens benignus

Vos vultu excipiet sereniore,

Vos larga premet osculatione,

10

Vos et perleget et manu tenebit.

Illi nomine mox meo agminatim

Haec mandata referte diligenter:

"O gentis decus inclytum Rosensis,

O rara probitate nominande,

15

Auceps Phasiacas dabit volucres,

Venator capreas lepusculosque,

Piscator maris amniumque predam,

Merces institor, hortolanus herbas;

Sic mittet sua quisque: sic Philippus

20

Noster conditor et parens patrono

Nos donat tibi, tu novas clientas

Sub patrocinio tuo tuere.

Vni nos tibi mittimur dicamur,

Vni scribimur, omnibus legemur".

25

Vldrici nitidos lares adite,

Centenae simul annotationes.