Endecasyllabon ad Franciscum Casatum oratorem ducalem

I, curre ad dominum citus, libelle,

I recta ad nitidi lares Casati,

Quo nil candidius benigniusque,

Quo nil doctius est politiusque.

5

Nostras diligit hic amatque nugas,

Hic patrocinio suo fovebit

Insontem ingenuum probum clientem;

In cuius gremio et sinu recumbens

Frontem nec metues Catonianam

10

Linguam nec metues Timonianam,

Nasutos quoque naribus repandis,

Mordaces quoque rictibus caninis,

Ronchos lividulos, iocos dicaces

Non assis facies, nihil timebis

15

Tutus praesidio mei Casati.

I, curre ad dominum citus, libelle.