Panegyricus ad Illustrissimum Principem Ludovicum Sfortiam, Conclusio
Ad eundem epigramma
Hesperios inter ductores inclite princeps,
Principe quo status hic sospite sospes erit,
Imperii columen, rerum tutela salusque,
Eximia proavos qui probitate refers,
5
Suscipe pacata devotum fronte clientem
Mancipiumque recens servitiumque fove.
Sunt tibi complures ex omni parte diserti,
Est tibi Pierius turba verenda chorus,
Inter quos cupio numerari, maxime princeps,
10
Inter quos unum da mihi queso locum.
Non erimus certe indecores, nec rustica nostra est
Calliope et nobis dexter Apollo favet.
Accipe sinceri munuscula parva Philippi,
Inspice si quid inest, quod placuisse queat.
15
Post lites et post decisa negocia rerum,
Post bene formatum compositumque statum,
Tunc liber vacuusque meum percurre libellum,
Atque hilari nugas perlege fronte meas.
Sexquihoram scriptis nostris impende; sed hora
20
Sufficit: hoc nimium est, substrahe dimidium.
Vix legere incipies succinti scripta libelli,
Pagina principium prima modumque dabit.
Iamque vale vivasque diu, mitissime princeps,
Et superes Phrygios Nestoreosque dies.
25
Dii tibi dent quodcumque cupis quodcumque mereris;
Dii mihi dent cupias ut meminisse mei.