⟨De secessu Baiano⟩
Ite procul curae pallentes, ite labores
Verbaque clamosi litigiosa fori.
Nullus amor, nullus vexet praecordia meror
Nec spes solicitet nec timor exanimet.
5
Nulla libido animum titillet, nullus[que] habendi
Vrat amor nec cor vellicet ambitio.
Iam valeant urbes urbanarumque tumultus
Et Venus et Veneris tela cupidinea.
Rura peto et culti praetoria devia ruris
10
Pastorumque casas exiguosque lares.
Rura colam rurisque deos Satirosque procaces,
Montivagos Panes silvicolamque Palem.
Hic Driades, nemorum nymphas, sectatur amatque
Semicaper Faunus ruricoleque dei.
15
Hic oviumque boumque greges armentaque pascunt,
Illinc Dametas visitur, hinc Tytirus.
Inter paganos paganaque fercula vitam
Degimus innocua simplicitate piam.
Hic madidi surgunt Baccheo nectare colles
20
Luxuriatque ferax vinea palmitibus.
Illic iam frumenta metunt flaventibus arvis
Messores Cereris munera frugiferae.
Hic tibi Palladias fas est decerpere baccas,
Hinc Praenestinas, Phyllidis inde nuces.
25
Mille voluptates et candida gaudia nobis
Prebet Baianus nomine dives ager.