Ad Matthaeum Boiardum comitem dignissimum
Componis satyras, arguta epigrammata condis,
Martia grandisono carmine bella tonas.
Alternis blandos elegis modularis amores,
Pindarica lyricos concinis arte modos.
5
Pastores tenui certantes carmine ponis,
Verbaque materno ludis hetrusca sono.
Res mira est: unum quis te putet esse poetam?
Multorum uatum pectora solus habes.
Clara sit innumeris aetas antiqua poetis:
10
Saecula sunt uno nostra superba uiro.