Ad villam suam
Villa mihi dilecta, vale, mea rura, valete
Et vos carminibus littora grata meis.
Vos nemora et saltus et amena vireta relinquo
Et te perspicuis hortule cincte vadis.
5
At si quid tenui promittere carmine possum,
Si nostras audit mitis Apollo preces,
Bacchica mellifluis non te Methymna racemis,
Non vincent segetes Gargara lata tuas.
Campanus tibi cedet ager, collesque Phalerni
10
Cedent Pestani mollia rura soli.
Nec tua Phaeaci vincent pomaria rami,
Nec passa Herculeas aurea silva manus.
Pan tua Taigeto transcurret prata relicto,
Pinguia Sicaniae deseret arva Ceres,
15
Et sacrae spreto properabit vertice Nysae
Bacchus, et amissas flebit Hymettus apes.
Forsan ab Aoniis veniet quoque Cynthius antris,
Et vatum fies Pieridumque domus.
Tu quoque contortis late qui cornibus erras,
20
Eridane, et placidis fluctibus arva rigas,
Clarus eris, nec te septeno gurgite Nilus
Vincet, nec celeri frigidus Hister aqua.
Ast tu qui nostro custos versaris in horto
Quique manu falcem, sancte Priape, geris,
25
Pelle procul fures avidasque repelle volucres,
Servet ut illaesas cultior hortus opes.
Caeruleus crescat cucumis lacrimosaque caepa,
Cultaque sit celsis terra papaveribus.
Pregnanti reptet tumefacta cucurbita ventre,
30
Et surgat laevi brassica fulta pede,
Lactucae, bulbusque salax et sectile porrum,
Intiba, radices, allia, rutta, crocum.
Effice ut intactis dependeat uva racemis,
Incurvent ramos grandia poma suos,
35
Et firmo indigeant formosa cydonia fulchro,
Langueat et lacero maesta marisca sinu.
Haec tibi si fuerint curae, donabere canna
Praelonga, et gratum falx nova munus erit.
Quin etiam surgent sacris altaria flammis.
40
Et cadet Archadico victima lecta solo.