Ad Ioannem Ruffum Forliviensem
Dum septena tibi peragrantur culmina Romae,
Dum me Ferrariae moenia, Ruffe, tenent,
Quid facimus muti tam longo tempore? Nullas
Accipio, nullas accipis ipse notas.
5
Innumeri fluxere dies; miratur uterque,
Alterius longas carpit uterque moras.
Nescio cur taceas, cum nunc secura Quirini
Tecta colas; nosti cur mea musa silet.
Quis tantos inter strepitus bellique tumultus
10
Ludere tranquilla carmina mente queat?
Moenibus obsessis, quis scribere posset amico?
Scribere mens optat, sed fera bella vetant.
Inter tot caedes, tot vulnera saeva, tot enses
Ingenii vires deperiere mei.
15
Audires crebris resonare mugitibus urbem
Parturit in medio saepe capella foro.
Arva inculta rigent spinisque implentur; oberrat
Huc illuc trepido rustica turba pede.
Prenduntur multi, Venetumque impellere duris
20
Coguntur remis pectoribusque rates;
Maxima pars laqueis, ferro cruciatur et igni,
Cogitur et parvas vendere pauper opes.
Heridanum currunt classes, exercitus agros;
Omnia perdidimus, Ruffe: remansit amor.
25
Restat amor, qui me tibi scribere pauca coegit,
Non potuit tantis qui cecidisse malis.
Sim licet hostili circumdatus undique vallo,
Te loquor absentem, te mea lingua vocat.
Sed tibi sum vilis: veterem contemnis amicum,
30
Deque tuo cessit pectore noster amor.
Debueras maestum blando sermone sodalem
Solari et placidis damna levare modis.
Excusanda forent tua longa silentia nobis,
Si coleres Latiis regna remota plagis.
35
Sed brevis ipsa via est, vicinamque incolis urbem
Et venit ex isto littera crebra solo.
Eia age, vincat amor curas, gratamque salutem,
Quam tibi non possum mittere, mitte mihi.