In Franciscum Alphanum

Nonne domi satis est mollem incurvare cinaedum?

      Quin etiam in sacris hoc facis ipse locis.

Namque inter tumulos ubi saxo erecta vetusta

      Ardua Franciscus templa beatus habet,

5

Ausus es infandum scelus hoc admittere, nec te

      Commovit pietas, nec timor ipse deum.

Hic tua, quae gelida tellure sepulta iacebat,

      Erubuit nati crimine laesa parens.

Erexere caput dira ad spectacula Manes,

10

      Auditusque ingens per cava busta fragor.

Ipse gravi strepitu tremefactus terga dedisti,

      Nudatis natibus fugit et ipse puer.

I, miser, i lateas caecis, Alphane, tenebris,

      Inque oculis hominum vivere te pudeat.

15

Iam vivis invisus eras, scelerate, sed odit

      Nunc mores etiam mortua turba tuos.