Clariss. d. Coelius Calcagninus Danieli Fino
Cum Lucina manu geniales promeret ignes
Passa comas, pectus nuda, soluta sinus,
Aonides lauros hederis et bacchare cingunt,
Atque novos cantus et nova plectra movent.
5
His cunas hederis, hac lauro ornate sorores:
Nuper enim Finum filia fecit avum.
Auctus prole mari Daniel, doctissimus ille,
Cui debet cultus Aonis ora suos.
Is Daniel vates cui non vota invita fundunt;
10
Qui reparat siccas pene Heliconis aquas.
Tu vero festive puer risu excipe matrem:
En avia auratae vellera texit ovis.
Non aliunde tibi sunt vitae exempla petenda:
Quod secteris habes quodque imitere domi.
15
Mater enim formam, censum pater optimus addet;
Ast animi ingenui stemmata fingit Avus.