Ad Cosmum Med. optimum Flor. ducem

Princeps inclite Thusciae Italumque

Splendor, semideum decus Parentum,

Cui cordi studia, et peritiores

Quos virtus aliqua evehit, locatque

5

Supra sidera, amas, foves, honestis

Iuvas officiis, favoribusque,

Ille, quem tibi nemo non proborum

Commendat, varia eruditione,

Divino ingenio, fide, pudore

10

Praestantem, quibus et novem sorores,

Et Phoebus simul et Minerva docti

Ornarunt animum viri; tenetur

Tetro carcere, nec refulget usquam

Virtus sidere clarior suprema

15

Illius celebris per orbis orbem.

Redde ergo precor e tenebricosis

Pro tua egregia benignitate

Suas delitias, suos amores,

Splendoremque suum, suumque honorem,

20

Hunc virum, studiis, Iovi senectae,

Vrbi, orbi, et tibi, tam tui colentem,

Quam qui maxime (ut est videre) servum.

Rumpe obstantia claustra, rumpe Cosme

Vincla, queis Ludovicus obligatur.

25

Poenarum satis et super datum sit.

Vincant te studia artium bonarum

Queis pollet, probitas, fideques rara

Exorent veniam, fugent tenebras,

Vincula expediant, solutus ut te,

30

Divinam et sobolem suis Camoenis

In coelum vehat, o beate Princeps.