Ah genus infoelix, quid mortua templa frequentas?

      Quid gelidis infers oscula imaginibus?

Ingredere in te ipsum, quoties vis templa videre;

      Nos et imago sumus vivaque templa Dei.

5

Nos habitat, non saxa Deus, non ligna, nec aera.

      Spiritus in nobis qui viget, ampla facit.

Memphiticum Moses potuit domitare tyrannum

      Pressaque servili demere colla iugo.

Phoebeas potuit Iosue retinere quadrigas

10

      Victor et in regem ingeminare diem.

Quid sequar et reliquos? Homo se cognovit Iesus

      Esse Deum et potuit filius esse Dei.

Exanimes rursus homines hic vivere fecit,

      Imperat et ventis, imperat ille mari,

15

Ante oculos posuit miracula plurima rerum,

      A patre testatus tradita cuncta sibi.

Non habitat templis manuum molimine factis

      Omnipotens, aedes aurea verus homo.