Giovanni Gioviano Pontano Parthenopeus 1, 14

14. ad puellas

O dulces animi mei lepores,

Solae deliciae meae Camoenae,

O plusquam Veneris papilla bellae

Et nympharum oculis venustiores,

5

Amabo, mea basiate labra.

Da mi basia, Gelliana, mille,

Da quot Lesbia iam dedit Catullo;

His addas volo millies trecenta.

Da dulcis totidem, Medulliena.

10

O desiderium mei furoris

Phyrne, consere labra cum labellis;

Pugnent humidulae per ora linguae;

Innitens manibus meoque collo

Pendens, in numerum et modum columbae,

15

Coeli sidera vince basiando.

Hyblaeo, Glyca, suavior liquore,

Si me vel digito semel lacessas,

Cordis deliquium mei videbis.

Sed me nunc animus meus relinquit.

20

Ah me nunc fugis, ah fugis, miselle,

Clitinam petis et petis Velinam.

Qui fiet, miser, ut duobus unus

Vivas pectoribus? Redi, miselle;

Nam si Fannia viderit vagantem,

25

Invitum capiet, tibique pennas

Victrix eripiet, redire nunquam

Ad me tu poteris, morique coges.