Giovanni Gioviano Pontano Parthenopeus 1, 28

28. ad Laurentium Miniatum

Vxoris nitidae beate coniux

Cunctis coniugibus beatiorque,

Quid sentis, age, de meo libello

Nobis dissere. Nunquid a Catullo

5

Quenquam videris esse nequiorem,

Aut qui plus habeat procacitatis,

Non dico tamen elegantiorem?

Sed certe meus hic libellus unum

Doctum post sequitur suum Catullum

10

Et Calvum veteremque disciplinam.

Non multo minor est novis poetis.

Saltat versiculis canens minutis

Hoc, quod non sonuere mille ab annis

Musarum citharae et Lyaei puellae.

15

Qui si evadere putidam culinam

Et tegmen poterit negare thynnis,

Fetentes neque vestiet siluros,

Studebit pueris placere ineptis,

Siqui Castaliae specus liquores

20

Parnasi nequedum bibere fontis;

Doctas sed fugiet manus virorum

Et qui Castalio sinu recumbunt,

Contentus, Miniate, si molestus

Non sit vel tibi, vel tuae Cicellae.