Giovanni Gioviano Pontano hendecasyllabi 1, 21

21. mortem sibi imprecatur ob zelotypiam

Quis haec, me miserum, labella suxit?

Quis has, me miserum, genas momordit?

Quis collo, ah miserum, notas reliquit?

Quis ah, quis teneras sacer papillas

5

Tractavit digitis manuque pressit?

Quis candentia gutture ex eburno

Accepit spolia ore, dente, labris?

Quis felix animam, beatus hudo

Quis de pectore rettulit salivam?

10

Quis o caetera, sed quis, ah quis? Heu,

Meme iam miserum iuvat perire.

Quis stricto pugione pectus haurit?

Hic, hic est dolor ense finiendus.