1. ad Antonium Calvum
Praetor Antoni, generosa proles
Calva, perfelix, Veneti senatus
Gemma, qua fulget Sibenica tellus
Syderis instar,
5
Solvimus grates Superum parenti,
Ad magistratum modo qui vocavit
Vrbis in nostrae laribus paternis
Te, bone praetor.
Pindari linguae fluvios disertae
10
Posco praeturam cupiens sonare,
Quam geris solers, animo modesto
Omnia librans.
Iura tu servas, quibus ut minister
Ponderas aequum pariterque iniquum.
15
Deligis rectum domitasque crimen,
Optime censor.
Cesaris pectus grave, sed benignum
Possides, nomen rigidi Catonis
Temperas, captas, Numa qua vigebat,
20
Religionem.
Tu togae lampas Venetae videris,
Tu tuae sydus domui nitescis,
Praesidet nobis tua rite virtus
Erygonea.
25
Tu sacerdotum venerandus ipse
Cultor, illustris procerumque amator,
Tu decus doctae specimenque turbae,
Inclyte praetor.
Tu colis vatum graciles Camoenas,
30
Tu sapis Phoebum redolesque laurum,
Tu geris clausas Charites sacrato
Pectore claras.
Dulcis auditor cytharae lyraeque,
Perlegas totam modo tu Thaliam
35
Fonte non vatum veterum madentem,
Rore sed astri.