8a. Endecasyllabon de officio scribae

Dici qui cupit optimus bonorum

Scribarum et viridem tenere palmam

Inter decurias recentiorum,

Monstrari digito, omnibus placere,

5

Sit prudens, facilis, bonus, fidelis,

Intra pectora sanctiora condat

Arcanum sibi creditum nec ulli

Promat. Sit modici brevisque somni,

Nullos difficiles putet labores.

10

Sit cultor domini frequens palati,

Primus ventitet, ultimus recedat.

Sit rerum veterum ac recentiorum

Thesaurus probus atque litteratos

Scribat versiculos epistolasque

15

Facundas, nitidas, breves, apertas,

Crebris sensiculis scaturientes,

Nullas stultitias ineptiasque

Nulla et barbara verba continentes.

Sit velox manus, expedita lingua,

20

Quae numquam calamum moretur acrem.

Huic sit vita severa, sermo comis

Vrbano sale et Attico lepore

Fartus non sine sanctitate avita

Verbosi fugiat notam malignam

25

Paucis expediens agenda verbis.

Cancellarius (ut recentiori

Scribas nomine nuncupem vetustos)

Dici qui cupit et cupit videri

Perfectissimus omniumque princeps,

30

Hic nil falsidico loquatur ore,

Nec sit polypus aut rapax Celeno,

Nummos exigat a cliente paucos

Subscribens precio levi libellos,

Nec lucrum petat inde, sed lucello

35

Contentus tenui paret favorem

Maiorum sibi, pauperum, minorum.

Talis si fuerit repertus usquam

Qualem rusticulus canit libellus,

Nostra hunc tempora diligent, probabunt,

40

Hunc et secula posterique dicent.