15. IN ILLVSTRISSIMVM ET EXCELLENTISSIMVM
PRINCIPEM FRANCISCVM GONZAGAM MANTVAE MARCHESEM
VENETORVM INVICTISSIMVM IMPERATOREM
DISTICHON
Principe gaudendum est iterum victore reverso,
Musa move residem desidiosa lyram.
TETRASTICHON
Dant sua Romanis victae cognomina gentes,
Et iam patratum testificantur opus.
5
At nondum victi dederant tibi nomina Franci,
Quae tibi venturae nuncia laudis erant.
DISTICHON
Nomen habes, Turcus, sunt haec praesagia rerum
Maxima, et hoc nomen grandius omen habet.
ALIVD
Esse ferunt regi Turcorum insignia lunas.
10
Sol tibi, Sol certe nobilitate prior.
ALIVD
Vincere ab occasu coepit, mox vicit ad ortum
Res haec magnae omen prosperitatis habet.
ALIVD
Prima fugant Gallos (crescit tua gloria) Gallos
Atque gravem morbum bella secunda domant.
TETRASTICHON
15
Prima domat Francos, quid aget maturior aetas?
Virtus certe aliquid maius adulta potest.
Suspicor his signis aliquid sublime notari.
Quod precor in lucem tempora nostra ferant.
DISTICHON
Gignit, alit virtutem usus, confirmat, et auget
20
Perge igitur, fies Scipio vel Marius.
TETRASTICHON
Omnia quae magnis capiunt e fontibus ortum
Flumina in ingentes amplificantur aquas
Si tuus a magnis sumens exordia rebus
Tendere in immensum significatur honor.
DISTICHON
25
Vive tuae splendor patriae, tecum Itala virtus
Surgit, et elatum tollit in astra caput.
IN THOMAM VVOLFIVM DECRETORVM DOCTOREM
AC AEDIS S. PETRI ET MICHAELIS ARGENTINENSIS DECANVM,
QVI HABEBAT BASILISCVM MORTVVM, IOCVS
Hydra venenoso letalia vulnera morsu
Intulit, et solo noxia dente fuit.
Natus in ardenti Libyae basiliscus harenae
30
Vulnerat aspectu, luminibusque necat.
Ergo tuum tanto maius decus Hercule Thoma,
Quanto oculos morsu longius ire potest.
Vt minus est oculis missum vitabile virus,
Gloria sic maior regulus, hydra minor.