Panfilo Sasso epigrammaton libri 2, 14

14. in amicam

Numquid, deliciae meae, puella

Te clemens pietas movebit unquam

Vt non, ferrea, me trahas misellum

In flammas sine fine saevientes?

5

Ostendis faciem mihi decoram,

Pectus candidulum, comas nitentes,

Qui fulgent oculos magis vel axe

Celesti, colit alta cum iuvenci

Phoebus cornua vel casam laconum.

10

Sed spectacula non gerunt salutem

Haec nobis, iuvat haud parum videre

Fontem si nequeo sitim levare.

Mercator mare sedulus per altum

Non aurum petit, indicas vel gemmas,

15

Vt tantum videat, nitore laetus,

Aurum quo capiat sed et lapillos.