Panfilo Sasso epigrammaton libri 2, 48

48. Silvula Hieronymum Veritatem
perfidiae accusat

Quae tecum loquitur puella, quae te

Amplexu fovet et libidinosis

Verbis provocat ad thori iocosas

Picti delicias, femur tenellum,

5

Pectus candidulum, manu proterva

Quae monstrat tibi, quae tibi volenti

Praebet basia dulcibus labellis,

Signat dentibus et genas malignis

Exardens Sybaritico furore,

10

Haec est saxea firmitas amoris?

Haec aevo stabilis fides diurno?

Hoc vult nobile nomen ac honestum

Quod stirpi proprium tuae tibique est?

Sed credas tua me canente furta

15

Qui te nomine veritatis omnes

Falso perfide nunc vocant, vocantur

Vero nomine falsitatis omnes.