Michele Marullo epigrammaton libri 4, 13

13. ad Faunum

Sylvarum nemorumque Faune cultor,

Vnus Naiadum timor sororum,

Seu parant posita lavare veste

Lascivum vitreis latus sub undis,

5

Seu molli recreare membra somno,

Ilex sicubi amica et alta fagus

Excludunt radios potentiores:

Vnam, Faune, meam cave lacessas,

Vnam, inquam, mihi cariorem ocellis.

10

Quae sit, forsitan, aut ubi, requiris:

Quam cernes mediam novem sororum

Nec voce impare nec decore formae,

Concentu fluvios morantem Etruscos

Ducentemque novo lepore sylvas,

15

Mellita comitante dicta Suada,

Hanc unam, precor, o benigne, castus

Castam praetereas et integellus,

Aversis oculisque vultibusque,

Siquando acciderit tibi videnda;

20

Nam timet mea Scala non latere,

Neu nos fraude mala deus lacessas.

Sic Nais tibi amica, sic Dianae

Mitis dextera et irritae sagittae

Sectanti comitum choros suarum!