65. Ioanni Mariae Placentino

Improba clamosi sequeris cur iurgia circi,

      Insani lites et fera bella fori,

Qui potes Aonii caelso sub vertice montis

      Argutam Phoebi sollicitare Lyram,

5

Ismarius veluti cum caelsa cacumina vates

      Parrhasis et saevas quas videt Vrsa feras

Carmine ducebat vel cum truculenta Chimerae

      Placavit dulci pectora flammivomae?

Causidicis tandem linquas pallatia raucis

10

      Quos rabies saevi quos decet ira canis;

Non Aganippaeas delectant bella sorores,

      Tristia virgineus non petit arma chorus.

Quo ruis, infoelix? Qui Phocidis arva relinquit

      Vt se plebeis ingerat officiis,

15

Se iacit in tumidum ventis resonantibus aequor

      Cum valeat placida ludere tutus aqua.