69. Antonio Caballo

Accedam tumidas numquid male sanus ad urbes

      Si nihil est in me quod petat urbis amor?

Ambicio cives agitat vaesana superbos,

      At mihi displicuit semper inanus honor.

5

Illorum pectus Crassi premit improba pestis,

      Me Curii mores Fabriciique decent.

Furta sequi Veneris gaudent scelerata procaces:

      Aligeri fugio tela facesque dei.

Sumen aprumque vorant, boletos, ostrea, mullos:

10

      Est lactuca satis nobilis esca mihi.

Per fora clamosas exercent stridula lites;

      Nihil clamore mihi tristius esse potest.

Inter se certant odiis rabidoque furore;

      Dulcia tranquillae foedera pacis amo.

15

Expellunt, rident quem non tegit aurea vestis:

      Me rudis et pullo vellere laena tegit.

Vrbem non igitur poscam quae nihil tenet urbis.

      Vrbs est in medio rure beata mihi.