41. In cives Faventinos

Quis vos tam subitus casus movet, unde tumultus

      Nascitur hic cives? Frigidus unde timor?

Vos, veluti muros tormentis rumperet hostis,

      Armatos media Cynthia nocte videt.

5

Tympana dant sonitus, sonitus dant cornua, saxis

      Cingitur arx, vallum tollitur, aera fluunt.

Quis furor, o miseri? Nunquid Telamonius Aiax

      Fortis et Alcides bella cruenta parant?

Mars ridet, ridet concussa Gorgone Pallas

10

      Adversus lemures spicula quod capitis.

Ah, pudeat! Nam quem terrent insomnia dormit

      Et vigilans nescit tempore quo vigilet.