In Agamemnonem
Polluti dolor hospitii atque iniuria raptae
Tyndaris in bellum geminos armarat Atridas,
Collectaque manu Danaum maria alta secabant,
Interea Egisti violento carpitur igni
5
Saeva Clytemnestre, penitusque Agamemnona corde
Expulit, et thalamos violavit iniqua iugales.
At postquam (Phrygibus crudeli Marte subactis)
Atrides primas victor remeavit in oras,
(O nulli sors fida diu) qui mille carinas
10
Rexerat, atque Asiam decimo deleverat anno,
Ante lares proprios exoptatosque penates
Coniugis incestae manibus trucidatur, et atro
Vulnere praecipitem fudit cum sanguine vitam.