5. ad sacram Eucharistiam

O sacra quae passum complecteris hostia Christum,

      Debita pro salvo gratia rege datur.

Hic iam crudeli consumptus morte iaceret,

      Ni tua divinam dextra tulisset opem.

5

Audisti a Franca diffusas gente querelas,

      Factaque pro domino vota precesque suo.

Hinc quam sublimi sacratus vertice gessit

      Ponitur ante tuos vota corona pedes,

Vt quondam Eoi posito diademate reges

10

      Munera submisso trina dedere genu.

Serves incolumi populum cum rege perhennem:

      Pendet ab arbitrio morsque salusque tuo.