20. ad Franciscum Deluynum eximium iuris consultum

Dum petis exsudans iussam, Francisce, Tolosam,

      Vt nova iuditio causa sit acta tuo,

Vado etiam intenso Normanam ardore per oram,

      Vt pars Baioci canonis una prober,

5

Et demum admissus certi possessor honoris

      Donata a Franco praemia rege feram.

Ardentis radio solis penetramur acuto,

      Spissaque demorsum musca cruentat equum.

Succurrit charus tanto Franciscus in aestu,

10

      Atque hylari durum mente levatur iter.

Quanta tuo emineat bonitas in pectore volvo

      Quantaque sacrati gloria iuris eas,

Vt digna excudas caedrinis carmina saeclis

      Puraque syncerus facta senator ames.

15

Grata etiam absentem meditatio cernit amicum:

      Vna anima in duplici est corpore verus amor.