29. de Eulalia
Vt bella, ut blanda, ut lepida utque venustula ludit
Eulalia, Hispanae filia Pasiphiles!
Vt bene maternos imitatur parvula mores,
Incedit, spectat, ridet, agit, loquitur!
5
Omnia ut illa facit tandem! iam fingere novit,
Et sibi de tenero quos amet ungue legit.
Bona sectatrix matris nata! o bona mater,
Tam bene dilectam quae instituis sobolem!
Vt tibi quandocumque obrepat inertior aetas,
10
Cum meretrix nequeas vivere, lena queas.