11. ad amicam
Me miserum quis nam haec tam bella labella momordit?
Improbus, et vere rusticus ille fuit.
Non aliter leporem canis, accipiterve columbam
Mandit: adhuc fluit en turgidulo ore cruor.
5
Quid nectis, malesana, dolos? quid, perfida, iuras?
Lividam ab impresso agnosco ego dente notam.
Atque utinam non ulteriora etiam malus ille
Sumpserit: heu duras rerum in amore vices.