38.

Diva, quae has caeli generatim in auras

Cuncta producis, cupidumque amorem

Vndique infundens, facis, ut perenne

Saecla propagent:

5

Qua nihil laetum sine, amabile est nil

Nilque iucundum, sine qua nec ipsae

Gratae erunt cuiquam Charites, nec ipsa

Blanda voluptas,

Dum tibi laetus reparatur orbis,

10

Dum per herbosos pecus omne campos

Vim tuam sentit, tibi plaudit omnis

Diva volucris;

Dum nihil, quamvis rigidum, feroxque est,

Ossibus quod non penitus sub imis

15

Sit tua tactum face, quod tuos non

Sentiat ignes,

Vna erit flammarum, et amoris expers?

Vna secura his Lalage resistet?

Tange age ultrici dea, pertinacem

20

Tange flagello.

Quod si ita tanges, fera ut obstinatum,

Applicet nostris animum querelis,

Nec preces ultra miseras, superba

Negligat aure,

25

Conseram laetam tibi diva myrtum,

Vancius qua se rosifer revolvit:

Hanc mero supplex, niveo et rigabo

Lacte quotannis.

Hanc et immistae pueris puellae,

30

Circum agent laetas pariter choreas,

Teque prima unam, simul ultima unam

Voce canent te.

Te canent unam, volucremque natum,

Qui ferox, duro et similis parenti,

35

Acer et flamma est, et agente certum

Cuspide vulnus.

Spargam odoratas violas, rosasque

Ipse ego, votique reus secabo

Grata torquatae ante tuas columbae,

40

Guttura flammas.