14. deprecatio Iosephi Sporeni
naufragio pereuntis ad Beatam Virginem
et responsio Virginis ei opitulantis elegia X
Iosephus
"Virgo o siderei regina superba Tonantis,
Cui datur aetherei sceptra tenere poli,
Felici praesto sis alite dextraque saevis
Fluctibus oppressam dirige, Virgo, ratem!
5
En mediis peritura gemit iam puppis in undis
Et iacet in tumido fracta carina salo;
Ecce negant tutos contraria flamina portus
Et gravis optatam denegat aura viam
Nullaque ferventes contendunt carbasa fluctus,
10
Vndique sed tumidi perstrepit unda maris.
Me miserum, Stygias opus est nunc ire per undas
Nigraque Tartarei visere regna dei,
Vmbrosas habitare domos et Cerberon altis
Quassantem barathri maxima regna sonis!
15
Ergo tanta meae meruerunt crimina vitae
Damna, ut tam subita morte miser peream?
Parcite iam, quaeso, iam parcite fluctibus undae
Et sinite optatos tangere puppe sinus
Et date iter placidum salvamque adducite navem
20
Insanamque, rogo, ponite saevitiam.
Littora iam valeant patriique valete penates:
En pereo et rapidis me rapit Auster aquis".
Maria
"Quid quereris? Dea sum, genitrix quae magna Tonantis
Dicor et aetherei praegenuisse Deum
25
Et coeli regina vocor; me regia divum
Gaudet quae aetherio lumine cincta micat.
Nil timeas, tibi opem pereunti maxima porto.
Pone metus, salva est puppis et unda tacet.
Vade age, et aetherio iam debita vota Tonanti
30
Perfice et incensis da pia thura focis".