26. ad Augustum Cocceianum

Sic te, candide amice, nullus umquam

Caelesti Sophiae, patrique Phoebo

Possit carior esse, dic amabo,

Num vere mihi dixit Hadrianus,

5

Te describere quidquid ipse ludo

Molli carmine per iocum, atque risum?

Hoc tu si facis, o nimis beatam

Musam Flaminii! graves, protervi,

Mordaces critici, venena dentis

10

Vestri nil metuo; quod approbarit

AVGVSTVS meus, id probent, necesse est,

Et Phoebus pater, et novem Camoenae.