19. argumentum psalmi CXXII
O quale cepi gaudium,
Cum dicerent: Adibimus
Templum Dei sanctissimum!
Te, magna, visam, civitas,
5
Tectis, viis, et moenibus,
Et civium concordia
Florentem, et almi Numinis
Tutela. Agris ex omnibus,
Et oppidis gens plurima
10
In te piorum singulis
Annis ter ad festos dies,
Et sacra sancta convenit;
Vt legibus mandat suis
Rector supremus caelitum.
15
Tu iura claris urbibus,
Legesque das; tu maximos
Reges alis; te Davidis
Proles frequentat inclyta,
Stipata semper nobili
20
Turba ducum. Precamini,
Cives boni, bona omnia
Huic civitati. Sit bene,
Feliciterque amantibus
Te, mater alma; nec tuis
25
Vmquam recedat finibus
Pax, et beata Faustitas.
Salus meorum civium
Tua salute nititur:
Templum Dei sanctissimum
30
Te reddit omnibus piis
Amabilem. Igitur usque dum
Ego vixero, semper tibi
Bona precabor omnia.