20. argumentum psalmi CXXIII

Ad te, beatas qui beatus incolis

Oras nitentis aetheris,

Attollo lumina lacrimis manantia,

Vitae meae spes unica.

5

Iniuriosa verberatus ut manu

Manus heriles aspicit

Flens servus, implorans opem domini sui;

Vt serva servi dextera

Pulsata, dominae dexteram aspicit suae,

10

Sic te, pater sanctissime,

Nos intuemur maxima fiducia,

Donec querelis tristibus

Aures benignas applicans adsis tuo

Nobis secundo numine.

15

Iam, quaeso, iam tuere supplices tuos

Vultu sereno; ista quoniam

Abominata gens sua superbia

Nos enecat miserrime;

Miserrime nos enecat gens impia

20

Irrisione, et iurgiis.