28. argumentum psalmi CXXXI

Supreme rector caelitum,

Non ipse regium ob decus

Inflatus efferor, neque

Perambulans sublimia

5

Mentis superbae somniis,

Maiora viribus meis

Tribuo, tribuere quam decet

Hominem caducum, inanis et

Imaginis simillimum.

10

Si non modestiam colo,

Si sumo magnos spiritus,

Turpissimae arrogantiae

Poenas gravissimas luam.

Qualis pusillus est puer,

15

Quem lacte dulci blandula

Vix alere desiit parens,

Talis animus, et mens mea est.

Vt ille totus optima

Matre acquiescit in sua,

20

Sic ipse toto pectore

Ex caritate pendeo

Caelestis optimi patris.

O te beatum, quisquis es,

Qui spem tuam in Deo locas!