14. dolet se iam senem fieri,
neque tamen adhuc coepisse deo ex animo servire
Eheu senecta crinibus
Iam sparsa canet, labitur
Aetas, ut unda fluminis,
Auremque vellens pallida
5
Mors admonet: Miser, ah miser,
Quousque pergis somnia,
Vmbrasque vanas persequi?
Iam iam supremi iudicis
Tribunal ad iustissimum
10
Sistere, cordis intima
Qui sensa, qui dicta omnium,
Qui facta novit omnia.
Haec vera certa iudicat
Mens, et relictis omnibus
15
Summo beato Numini
Servire totis viribus
Exoptat, ardet, nititur;
Sed heu misella sordidae
Affixa terrae, inaniter
20
Laborat. Eia age subveni,
IESV benigne, subveni,
Tuamque dextram porrige.
Tu morte mortuum tua
Olim evocasti ex inferis:
25
Nunc vita me vivum tua
Perire ne rursum sinat.
Humana fac spernam omnia,
Nudumque te nudus sequar,
Et ponderosi corporis
30
Me solve tandem nexibus;
Vt pura mens et integra
Aevo potita caelitum,
Te, sancte, et optimum Patrem,
Et sempiternum Spiritum
35
Laudare numquam desinat.
IESVS suorum supplicum
Tutela, portus, gaudium,
Quae mente tota deprecor,
Concedat: ipse gratias
40
Agam benigno Numini,
Eiusque laudes pectore
Laetante semper concinam.