Giorgio Cichino carmina 2, 76

76.

Quo tibi numeros, amice, pacto

Laetos mittere vel queam iocosos?

Abstulit mi animum dolor recens, heu,

Gaudii super est nihilque risus,

5

Flebis tu quoque, nam pium geris cor

Et tristes miseraris usque casus:

Petrus, flos iuvenum elegantiorum,

Quotquot Vtinea vagantur urbe,

Nuper funere mersus est acerbo.

10

Heu fata impia, sors fera, astra dura,

Heu Parcae iuveni nimis severae,

Tam bellum iuvenem atque tam venustum

Immites potuistis enecare?

Vos demum merito invidas vocari

15

Virgines scio, cum puellularum

Dextra dispereat puer venustus.

Te lugent pueri puellulaeque,

Te domus tua tota Gurgitana,

Quod prima ante diem, puer, iuventa

20

Indigne raperis maloque fato,

Gurges, gurgite mergeris sub atro.