33. ad Gaudinum
Hasne tuae taedas natae Gaudine parasti?
Haecne tibi optatus gaudia praebet Hymen?
Vt dum quisque hilares contendit adire Hymenaeos,
Proh dolor, ecce venit moestus ad exequias;
5
Et qua forte die thalamo spectanda mariti
Nupta erat, invisum ducitur ad tumulum.
Et tu vivis adhuc nata Gaudine sepulta,
Nec potis est vitae rumpere fila dolor.
I pater infelix, vivum te conde sepulcro:
10
Nec tibi dent nomen gaudia, sed lacrymae.