Bargeo carmina 2, 26

Reference basis text: Paola Gianfilippi de' Parenti, tesi di laurea Università degli studi di Padova, 1989-90

Editing of the digital edition: Michela Naccari


26. VOTVM PRO SVSCEPTA VENATIONE, AD DIANAM

Sic tua Panchaeis fragrent altaria donis

      Venantique omnes dent tibi terga ferae;

Sic te nocturnas terrae incedente per umbras

      In triviis ululet sedula turba canum.

5

Susceptum da Diva mihi decurrere munus

      Et facili, quo iam coepimus, ire via.

Instructi ut nostris venantes artibus olim

      Audaci subeant horrida tesqua pede.

Non ego tum variis spargam modo floribus aram

10

      Suspendamque alto plurima dona tholo,

Sed caput immanis praefigam postibus apri,

      Nec non et Scythicae cornua vasta ferae.

Adsis, o Diana: tuus iam retia ponit

      Et praedam toto littore Cosmus agit.