18. ad Raphaellem Cyllenium ode decima octava
Raphael virtute nitens parentis
Voce qui docta iuvenum audientum
Evehis mentes, viridi locasque in
Vertice Pindi.
5
Degener non es; genitore natus,
Quo magis nullum sophia refertum
Cernit Argois, Latiisve in oris
Pulcher Apollo.
Es tui magnum, decus, et tuorum,
10
Optimus cultae fidicen Italiae,
Aut canis Martis fera bella, sive
Dulcia furta.
Te meae semper resonet Camoene.
Vsque Cylleni meditabor, ut te
15
Laudibus tollam super astra, vates
Sim licet imus.